*“आईचं नाव खाकी वर्दीवर”,उपसभापती डॉ. नीलम गोऱ्हे यांच्या हस्ते अंगरक्षकाच्या खाकी वर्दीवर नेमप्लेट लावण्याचा भावपूर्ण क्षण*

मावळ मराठा न्युज-पुणे,दि.३०जुलै २०२५, विधान परिषद उपसभापती डॉ. नीलम गोऱ्हे यांच्या अंगरक्षक पदावर कार्यरत असलेले पुणे पोलीस कर्मचारी श्री. निवास मंगल सर्जेराव वाळवेकर यांनी आपल्या खाकी वर्दीवरील नेमप्लेटवर एक आगळा-वेगळा आणि भावनिक निर्णय घेतला आहे. त्यांनी आपल्या नावासोबत आईचे नाव – ‘मंगल’ – जोडून “श्री. निवास मंगल सर्जेराव वाळवेकर” अशी नव्याने नेमप्लेट तयार करून घेतली आहे.विशेष म्हणजे, ही नव्याने तयार केलेली नेमप्लेट विधान परिषद उपसभापती डॉ. नीलम गोऱ्हे यांच्या हस्ते वाळवेकर यांनी सन्मानपूर्वक व अभिमानाने लावून घेतली. डॉ. गोऱ्हे यांच्या हस्ते नेमप्लेट लावणे ही केवळ औपचारिक बाब नव्हती, तर तो एक स्त्री सन्मानाचा आणि मातृत्वाच्या गौरवाचा अभिषेक होता, असेच म्हणावे लागेल.डॉ. नीलम गोऱ्हे यांनी या प्रसंगी वाळवेकर यांच्या निर्णयाचे कौतुक करताना म्हटले की,”आईचे नाव आपल्या ओळखीत समाविष्ट करणे म्हणजे आईच्या कष्टांचे आणि त्यागाचे सार्वजनिक स्मरण आहे. हे इतरांसाठीही प्रेरणादायी ठरेल.”श्री. वाळवेकर यांनी सांगितले की, आपल्या यशामागे आणि आजच्या स्थानामागे आईचे अमूल्य योगदान आहे. म्हणूनच वर्दीवर तिचे नाव अभिमानाने झळकावे, हीच भावना या मागे आहे.या प्रसंगाने एक गोष्ट निश्चित केली की, खाकी वर्दीतला माणूस केवळ कर्तव्यदक्ष नाही, तर संवेदनशील आणि आपल्या मुळांशी जोडलेलाही असतो.