प्राधिकरण ज्येष्ठ नागरिक संघातर्फे” फुलोरा” विविध गुणदर्शन संपन्न

प्राधिकरण निगडी -प्राधिकरण ज्येष्ठ नागरिक संघातर्फे दिनांक १० मे २०२६ रोजी “फुलोरा”हा विविध गुणदर्शनाचा कार्यक्रम, निगडी येथील मनोहर वाढोकर सभागृहात संपन्न झाला . वय विसरून अनेक ज्येष्ठांनी महिला उत्कर्ष गीतांवर आधारित नृत्य सादर केले. तसेच एक युगलनृत्यही सादर झाले . परंतु संपूर्ण कार्यक्रमाचे मुख्य आकर्षण होतं ते म्हणजे “तेरी भी चूप” हे नाटक ! या नाटकाचे लेखन श्री मुकुंद जोशी यांनी केले होते , तर दिग्दर्शन श्री व सौ वर्टीकर यांनी केले होते . “ती” ही नाटिका सगळ्यांच्या विचारांना जागृत करून गेली. त्याचे लेखन व दिग्दर्शन सौ अर्चना वर्टीकर यांनी केले होते. सर्व कलाकारांचे अभिनय लेखन व दिग्दर्शन सर्वच गोष्टींना रसिकांनी भरभरून दाद दिली .या कार्यक्रमात नवनिर्वाचित अध्यक्ष श्री. चंद्रशेखर जोशी यांचा सत्कार करण्यात आला व त्यांनी कार्यक्रमास शुभेच्छा देऊन कार्यक्रमाची सुरुवात केली. सुरवातीला, “ओम नमोजी आद्या” हे इशस्तवन गाऊन कार्यक्रमांमध्ये मांगल्य निर्माण केले. कार्यक्रमाला माजी उपमहापौर सौ. शैलजाताई मोरे , सामाजिक कार्यकर्ते आणि ज्येष्ठांचे मानसपुत्र श्री बाळासाहेब शिंदे , डाॅ. श्री माऊली फरांदे हे कार्यक्रमास उपस्थित होते. या “फुलोरा” कार्यक्रमांमध्ये २६ ज्येष्ठ सभासदांनी सहभाग घेतला होता. श्री विश्वास फडणीस व त्यांची नेपथ्य करणारी टीम यांचे काम फार कौतुकास्पद होते. या कार्यक्रमाचे सूत्रसंचालन सौ. वृषाली गुर्जर यांनी केले. यानंतर, हास्य दिनाचे औचित्य साधून, सर्व हास्य संघांनी विविध हास्य प्रकार , विडंबन काव्य व चुटकुले सांगून “हास्य दिन” साजरा केला , ज्यामध्ये १९ सदस्यांनी सहभाग नोंदवला होता. या कार्यक्रमाचे सूत्रसंचालन, सौ. ज्योती कानेटकर यांनी केले.संघाचे उपाध्यक्ष श्री. दिलीप गोसावी यांनी आभारप्रदर्शन केले, संघाची प्रार्थना होऊन, या सुखद कार्यक्रमाची सांगता झाली.